Welcome visitor can you Log In or Create an Account

Call us now: +5999 6637989

Festival di Tumba 2023, e di 51 edishon.

Edishon yòn yòn na edat i eksperensia, pero GRANDI  na talento.
Edishon ku a demostrá ku na kabuya bieu, ta un nobo mester konopá.

Nos hóbennan a saka kara di nan mes, di nan mayornan i  di nan mentornan.
Mentor manera p.e. un Elia Isenia, Randal Corsen, Ike Jesurun, Darwin Gregg, Gregorie Colina, Edsel Juliet i mas.
Ku a instruí i guia nan.
Ku tabata presente riba e stage, .... para den un huki apoyando nan i kompañando nan, formando un fiesta riba e stage, pa asina nan yega final di nan presentashon ku éksito.

Asta mi lo durf bisa ku nos apresiando defuntu Anselmus "Boy" Dap, tabata presente huntu ku e hóben Charelsonc "Sontje" Mercelina.

Esta dushi i bunita e kos aki ta.

Mi ta spera esaki bira ehèmpel den nos komunidat pa asina den tur otro situashon tambe nos grandi nan ta habrí pa siña i guia nos hóbennan. Ta Grandi i Eksitoso só nos lo bira, konopando e kabuya nobo na e bieu, hasiendo e kabuya mas largu i fuerte.

Mi no ke terminá sin suprayá un bia mas kon talentoso  e hóbennan ta, ki GRAN presentashon kada un di nan a duna.

E festival di tumba aki tin kompetensia fuerte aden, entre nos hóbennan i nos artista grandi nan.

Por último mi ta deseá tur e 30 partisipante nan pa mayan, EXITO, sigui pa dilanti i mi ta spera di mira boso bek den edishon 52.

 

Rhoünda Margarita.

Average: 5 (2 votes)
Location: